Arwain y Gymuned

Mae hawl unigryw gyda'r cyngor i arwain ei fro. Ac yntau'n gorff atebol ddemocrataidd ac iddo bwerau, swyddogaethau a dylanwad eang, mae'n hanfodol i dynged y fro mae'n ei gwasanaethu a bywydau'r trigolion.

Ystyr arwain y gymuned yw diffinio delfryd ar ei chyfer a gweithio ar y cyd â nifer o bartneriaid yn y sectorau gwladol, gwirfoddol, cymunedol a phreifat i'w wireddu. Mae modd gwneud hynny trwy gynnal partneriaethau, cytuno ar strategaethau, cydweithio a rhannu adnoddau.

Mae gan bob cyngor bwerau statudol i hybu lles economaidd, cymdeithasol ac amgylcheddol ei fro – trwy'r strategaeth gymunedol, fel arfer. Mae gofyn iddo lunio strategaeth gymunedol a ddylai ddod â phob partner at ei gilydd a rhoi delfryd a chyfeiriad y tymor hir i'r fro i gyd. Yn ogystal â'r brif strategaeth honno, bydd y cyngor yn paratoi nifer o strategaethau pwysig eraill megis cynllun datblygu lleol, strategaeth ar gyfer plant a phobl ifainc a strategaeth iechyd a lles.

Gall y syniad o arwain y gymuned olygu nifer o bethau i'r cynghorydd unigol, gan gynnwys hyrwyddo buddiannau ei gylch etholiadol, dylanwadu ynghylch pryderon pobl leol, darbwyllo partneriaid i weithio yn ôl y delfryd safonol, cymodi ymhlith mudiadau bro, helpu'r mudiadau hynny i ddatrys problemau lleol a phwyso a mesur rhinweddau pob cais am adnoddau er mwyn dod i benderfyniadau a fydd o les i holl ardal yr awdurdod.

Yn ôl i’r brig